Nova colliaziun da viafier Scuol - Landeck
1. Situaziun da partenza
En il triangul Scuol – Landeck – Damal existan gia dapi var 100 onns plans per construir colliaziuns da viafier. Gia avant l'Emprima Guerra mundiala aveva la Viafier retica plans per prolungar il traject da l'Engiadina bassa da Scuol a Danuder (ca. 31 km). A Scuol è perquai vegnida construida gia l'onn 1914 la "storta tirolaisa" d'ina lunghezza da var 200 m per in'eventuala cuntinuaziun da la lingia da la Viafier retica. La Viafier dal Vnuost vuleva percunter ina colliaziun cun la Viafier retica a Fuond. Quai sur la viafier dal Raisch ch'era medemamain planisada da quel temp da Damal a Landeck en il Tirol.
Ina nova colliaziun da viafier tranter Scuol e Landeck sco lingia d'apport per l'Engiadina resp. sco colliaziun da l'Engiadina cun Landeck / Puntina pudess porscher novas perspectivas economicas a las regiuns pertutgadas.
2. Finamiras dal studi
Il studi d'opportunitad duai respunder las suandantas dumondas
- Tge pretensiuns han las regiuns areguard ina tala colliaziun?
- Tge effects svegliass questa nova colliaziun da viafier per l'economia publica?
- Tge novs potenzials da purschidas turisticas pudessan resultar qua tras en il turissem?
- Tge effects turistics èn da spetgar?
- Tge consequenzas vegn la colliaziun ad avair per ils ulteriurs meds da transport?
- Con influenzescha la colliaziun las frequenzas da l'auto da posta, dal traffic individual motorisà, da las telefericas e dals hotels en la regiun?
- Ha ina tala colliaziun dal traffic consequenzas negativas?